癸巳年十月卅日，晴。
當日係星期一，係突登請假為咗星期日打算去完紅石門後翌日休息一日，但星期日嗰日個手機同smartphone都冇乜電，原定嘅計劃就咁樣就取消，改為翌日星期一行大嶼山分流。
然而星期日 Raymond 到訪我嘅狗竇，傾談之間得知佢忙完個 project，嚟緊放成個禮拜假，既然係咁，二人成行總好過固我獨行。
之前曾聽 Raymond 講話佢自己一個人由海下沿車路行去西貢市，以距離計都唔算短程，所以按行分流既定嘅計劃路線可以不變。
唔計丫髻山（連我自己都唔記得幾時有同 Raymond 行過丫髻山），以我所記得就未曾試過同 Raymond 行過山，步速如何未可得知，保險計都係帶埋電筒穩陣尐。
星期一約實 7:30am 先去茶餐廳食早餐，然後搭 E34 到東涌再搭 11 號巴士於石壁落車起步。
到達石壁剛過十點不多。不須順道去去洗手間，亦不用稍侍停留以作裝備一番，就開始“競賽”式的“目標導向”行進。
約莫近一個鐘後，我哋已經過了落狗嶺涌的分义口，沿途不作小休，只係 Raymond 稍停一下飲啖水又繼續前進。
假若同行行友嘅行速有所不及的話，我會因應時間未必會落分流東灣以及炮台而直接落西灣，但既然時間倘早，當然路線就不需縮減。
喺分流東灣見到有仙人掌開花，本來想嚟個微距近影，但無耐目標物周圍都長滿帶刺嘅仙人掌，不好接近，唯有遠攝兼拾了兩個仙人果，希望試試在家種植。
由分流東灣沙灘有小徑經分流炮台往分流西灣，分流炮台沒有炮座，更甭會有炮身。在於我來講現今的分流炮台就只係一個籃球場大小嘅平地周邊圍上個許人高的磚牆吧。
由炮台往西灣中途不難發現一座天后宮廟築立於近海邊，曾經多次的行經分流西灣，甚至於在西灣露營，都未有一次能近距離去拜會這間廟，而今次亦都唔例外…
到達分流西灣，唔見富記士多嘅何伯，幸好仲有陳記士多可以補給。Raymond 買咗兩罐汽水及一支礦泉水，每樣 $10。喺士多“大休”不過半個鐘，食食麵包逗逗大狗（黑色長毛狗「阿妹」），Raymond 就提議繼續行程。
喺去大澳嘅途中 Raymond 步速稍為放慢，並時不時望著手機期待甚麼似的。人在野外心卻在公司，對工作上嘅熱誠我就遠不及 Raymond 矣。
幾年前二澳曾有段時間封村禁止外人進入，而現在正進行大幅度的復耕開墾工程，有告示牌標明在進入私人土地上嘅遊人（行山人仕）責任自負。而且村內並沒有明顯小路或方向指示接回通往大澳嘅舊路，但出大澳嘅舊路係有嘅，只係可能要喺二澳遊盪大半個村先至能夠接返鳳徑舊路。
由出咗二澳村嘅路行去大澳都唔洗一個鐘，而去到大澳都未到三點。Raymond 提議搵地方食尐嘢，咁就搵咗間茶餐廳叫兩個碟頭飯（星洲炒米、西炒飯 {per dish $37}）醫醫肚，打後順道買尐海味乾貨（大地魚乾、魚粉）便搭車走人。
後 話：知所以要帶smartphone係因為可以用Oruxmaps哩個手機app嚟記錄行進路線嘅GPS座標，只係到宜家都仲未知點plot個track 落Google map或其他free map再轉做jpeg檔，而且用手機影相亦可以記錄埋GPS座標，只係用手機影出嚟嘅相嘅色水以及景深都好有問題，所以主力都係用數碼相機嚟影相~
View 131202 分流、二澳 Fan Lau, Yi O in a larger map
沒有留言:
張貼留言