View jdx-131225f_Sheung Tong, Fu Kwai Lung in a larger map
癸巳年十一月廿三日（星期三），晴，頗大煙霞。
是日為公眾假期（聖誕節），亦是工廠指定的勞工假日。
星期一，阿仁打咗兩次電話俾我，但因為工作場所太過嘈雜而冇聽到電話，直到放工至覆返阿仁，佢問有冇興趣由荃灣行富貴龍出青龍頭，聽佢講係短途線一條，而且富貴龍係乜地方我都唔知，既然有人帶隊嘅話我當然係有興趣啦！
返到屋企，即時聯絡Ivy同阿達，但兩位都冇即時肯定，而喺翌日回覆話已確實咗其他安排而不能參與同行。
原本諗著得阿仁、Donald同我仨行這條佢倆都行過嘅短線，在約定喺荃灣地鐵南豐出口九點九集合，先出現嘅喺阿仁，及後見到阿歐，之後有自詡老頑童嘅崔師兄，再後更有久未見面嘅“廖博士”廖sir，最後領隊Donald才出現。在阿仁聯絡間發現仲有人未到，據說人仍在東涌，大隊决定唔能夠等，决定起行。
問及Donald點解咁遲才到，原來係佢身體唔多好，本來唔想嚟，仲揭示背腰位置嘅葯膏貼，是因為咳得太過犀利而傷到嘅。而當日間唔中亦聽到佢有幾聲咳。
早上十點開始行程，先由“地胆”崔師兄帶路遊花園，在公園整理裝備及方便過後，再過荃景圍嘅元荃古道出口位，開始向上塘進發。
由元荃古道起點至石龍拱呢段路都係不斷咁向上行，而廖sir可能太過耐無做運動，又或者冇先鬆筋嘅關係，行得頗為乏力，反而崔師兄竟然比阿仁仲快上到石龍拱，一問之下原來阿仁六七月左右傷過膝頭蓋位置，至今仲未好返。
去到往上塘嘅分义路口前，見有隻帶頸圈嘅大黃狗喺路邊徘徊，而附近又唔見個狗主，少不勉都會停一停去逗逗狗。
沿小路進入上塘大草坪地，在廢屋旁隨着有色帶做標記嘅山路通往富貴龍，而所謂嘅富貴龍其實係採礦石場（聞說是鎢）嘅礦洞或探窿，且石礦場前有片碎石坡。到達礦場空地已經過咗一點，小隊六人就係空地大休。
大休有近一個鐘，期間飲飲食食，傾計影相。廖sir因為負重不少，一衆為減輕廖sir嘅重擔不遺餘力。
休整過後繼續行程，過咗小澗後冇耐就接返麥徑九段 （M162~M163之間），喺往河貝嘅分义路口睇漁護署地圖先至知：包括麥征第九段在內的明顯路徑已納入為大欖越野單車徑，約有九段。
沿石屎路行，不難搵一處有枱有凳嘅地方小休，亦係為廖sir負重減磅嘅好機會（分享佢帶嚟嘅食物），其中嘅花生最備受賞識；比起白衣的天府花生嘅咸乾味，我自己比較鐘意紅衣而又大大粒嘅山東花生，嚼落有如花生醬般嘅滋味。廖sir帶嚟嘅花生介符兩者之間，惜量少宜淺嘗。
擇路往清快塘前進，由田夫仔嘅分义口至轉入清快塘嘅路口約需行一個鐘。
到咗清快塘嘅農莊又見返早前喺上塘分义口前遊盪嘅大黃狗。喺農莊士多小休半句鐘，因為 廖sir又帶咗成包炸蠶豆，所以叫咗三支啤酒及汽水嚟送呢味小食，而我唔太愛冬天飲凍嘢，廖sir就特別叫咗壺熱茶（普洱），全部由廖sir埋單（在此多 謝廖sir！）。
小休過後繼續行程去深井，原本一衆熱議去陳記食燒鵝，因為意見分歧而不了了之，各行友就喺深井散隊，結束一日短途慢行嘅行程。
小 記：當日我都有帶手機做GPS記錄，但因為電量唔夠，只記錄到一半路程，而Donald亦有用手機做GPS記錄，不過佢用嘅係My Tracks。而據Donald講Google Maps可以import .kml file 入map做tracking，但目前Google Maps import只受.csv及.xslx嘅file做layer，幾經搜尋才知道可以用返classic My Maps嚟import .kml file，不過都只係喺嗰map上畫條track，而我最想嘅係喺某尐特別嘅位置（例如分义口等）顯示記錄嘅時間，不過都好過冇。
你拍得黃狗好強壯
回覆刪除