甲午年正月初三，天晴，早上有煙霞，下午續漸消散。
以往每逢新年前幾日，喺我識得鐘意行山嗰班朋友之間都會約定年初三計劃有乜行山活動，但今年例外，除咗因為我唔會主動做攪手，亦可能我想行嘅路線唔多吸引亦唔想煩到人哋有關。
而自己為今年初三計劃咗三條線：紅石門（由上年諗到依家都未實行）、獅尾脊（由天馬苑上比較應節{只係因為嗰名有嗰馬字}，唯尾段未曾探遊）以及杯靈雙渡。
雖然有朋友早於一個禮拜約話初三上天水圍友人屋企拜年兼敍舊，只是我推說不能確實，然而本來係“結伴同遊”嘅活動，因為有人爽約就變成“固我獨行”吧！
其實早於前年及上年兩遊圓頭山都因為狀態唔好而落良景作罷，而今次杯靈雙渡原本就打算再考驗自己嘅體能：上靈渡、過青山、落蝴蝶。
早上八點起行，先沿着以往行路返洪水橋工場嘅路線行去屏山屏厦路，之後沿屏厦路行至厦村市前轉田厦路入厦村路，在貨櫃場旁走小路往靈渡寺。
宏達路
右轉屏厦路
天水圍西鐵站
左轉田厦路
右轉厦村路
樹陰底下嘅小路入
當未行到呢個位置嘅時候，會有個錯覺只係見到個鐵閘而見唔到右邊條路
喺未到靈渡寺前嘅「香港國際少林文化中心」外嘅空地竟然有三隻草羊正在食草，可惜出年先至係羊年，唔算應景。係香港係比較難見到活羊，要見活馬就只能去馬場走走。
三羊(陽)啟泰？
由靈渡寺開始上圓頭山嘅路途野草茂密兼有晨露，未到山腰褲腳已經濕咗一大片，不過全程都只係呢段開頭有咁清爽，沿途除咗菠蘿山外就真係冇乜樹可以遮蔭。
正在行上圓頭山前架有電塔的山腰時，望向圓頭山竟發現有條明顯小路可由東面直上圓頭山，尚記得自己第一次由圓頭山搵路落山，去唔到靈渡寺之餘亂打亂撞就經貨櫃場出亦園村口大馬路搭輕鐵走人。
遠望圓頭山東面嘅路肧
到達圓頭山嘅時候已經過了十點，由山頂望向深圳灣公路大橋仍依稀可辨，但蛇口嗰邊望落就一片模糊，就算係元朗洪水橋方向都帶有一層霧霾。由於有兩次敗走良景 嘅教訓，為避免因太遲吸收水份（我另一個行山嘅‘壞習慣’）而可能導致腿部抽筋，决定喺到達每個山頭飲一啖水，我諗咁樣就可以大概估計要過幾多個山頭先至 到達青山呱~，雖然今次自己帶嘅水唔多，只有一公升。
舊年上圓頭山時已經有嘅棚蓬
深圳灣公路大橋
元朗洪水橋一帶
屯門市
遠望青山
由圓頭山本身個山頭唔計，約莫過咗三個山頭，飲咗三啖水，而當去到第四個山頭嘅中段， 就係一個比較出名嘅險位，係得一個腳板位闊度咁窄嘅路脊，兩邊懸空至少疊埋三四個人咁高，雖然條脊唔算長，但對面企邊條罅隙又太過‘實在’（其實同上年經 過時一樣明顯），當然照樣可以過，但穩陣計可以兜下路過對面，只係心諗條脊究竟可以維持風雨不變幾耐呢？
第四個山頭其實就係乾山，喺山坳上 尐未到山腰嘅左邊有分义路，以為條路可以唔洗上山頂兜過另一邊接返原定路線，點不知條路越行越唔明顯，只能靠著以前有人喺矮樹叢綁嘅膠袋確認路肧嚟橫過對 邊山脊。過到山脊嘅腰位至發現行緊嘅路肧係會接著深入腹地嘅小路，並唔係好似我之前所諗咁，而腹地方向傳嚟好多摩打嘅聲音，聲音嘅來源原自夾谷對面嘅山崗 上衆多嘅電單車，而山崗上插著一枝紅旗，睇程况就好似要喺腹地進行比賽一樣。我既冇心去留意佢地發展如何，唯有繼續沿著山腰開路逐漸向山頂進發，試圖接返 原先落良田坳嘅路。
遠看中間山脊上嘅電單車羣
接噃山路到達波蘿山上次嘅樹蔭位大休，雖然有風，係吹西風，但飄著一陣陣由堆填區發出嘅奇氣怪味，差尐又令我打消上青山嘅目標而重覆上年以及上上年嘅路線。隨隨便便食塊餅乾飲幾啖水也就繼續起程。
在此大休冇半個鐘
由良田坳開始就係間間斷斷咁向上行至青山頂，下午能見度高，霧霾消散得七七八八，望向黃金海岸、元朗及深圳小南山都比朝早嗰時清楚。大概行到半山腰時雙腳已 經有攰嘅感覺，酸酸軟軟不着力嘅感覺加上吸著淡淡嘅怪味（比起喺良田坳嘅輕微咗尐）令整段路並不好走。已經喺邊行邊停咁慢慢上山，雖然午後嘅太陽唔算太毒 （地表溫度唔算高），但都係想搵個蔭位唞唞，見山路旁不遠處嘅大石下草叢有片暗位可以遮蔭，躺臥草上望著藍天遠景，有夠舒服，如果唔係太近路邊怕太礙眼， 可能我唔止唞半個鐘，當然自己亦知道唔可以唞得太耐，唞夠就起行！
天水圍及元朗方向
屯門市及三聖方向
遠影黃金海岸
良景邨
前為山景邨
躲於草叢看天空
回望圓頭山
上到青山已經三點，係時候由狀態及心情嚟决定跟著嘅路線，如果繼續全程落蝴蝶邨走的話，未必能夠趕得切去朋友屋企赴會敍舊，加上雙腳大脾好似有輕微抽筋咁款，就决定落青山寺出西鐵站返屋企整理一下再去拜年~
眼見由青山寺行上青山嘅人都唔少，沿途有唔少唔矮嘅石級，令到我間唔中都要落吓停吓咁撐落屯門市搭西鐵走人。
左為龍鼓洲，右係內伶仃島
青山腹地及至小南山
後記：
今次我就主力以手機嚟影相，一來手機相有EXIF嘅GPS記錄，二來係青山腹地嘅山景大都一個樣咁，三來自己用開嘅數碼相機太重，掛出嚟唔方便行山。
返到屋企睇噃GPS track先至發現由朗屏過咗商塲之後就亂晒大籠，要去到屏山屏厦路燈位停定至回復正常，最有可能嘅會係smartphone嘅GPS喺商塲入面定唔到位 嘅話，當出返去見星嘅時候如果唔停低嘅話就會出現位置計算上嘅誤差，不過由厦村路入貨櫃場旁小路途中都有異常出現，呢個就唔識得解釋…。
我發覺原來要寫起呢篇文章都要成兩日抽約十個鐘嚟完成，最大嘅原因就係經常‘執筆忘字’。唉~ 見工嘅時候真係唔知好唔好講比人聽自己唔多識寫中文…
 |
| From 140202 甲午初三之杯靈雙渡縮減版 Wooden horse year hiking - Yuen Long to Castle Peak |
View jdx-140202x_Wooden horse year hiking - Yuen Long to Tsing Shan in a larger map
沒有留言:
張貼留言